Conto pidato sambutan dina acara upacara kalahiran anak

السلام عليكم ورحمة الله وبركاته

الحمد لله رب العا لمين,  وبه نسثعين, وعلى امور الدنيا والدين,-والصلاة والسلام على اشرف الانبياء والمرسلين, وعلى اله وصحبه اجمعين, ... اما بعد

Langkung tipayun, mangga urang sami-sami manjatkeun puji sinareng syukur ka hadirat Allah SWT. tina saniskara ni'mat sareng karunia-Na anu dipaparinkeun ka urang sadaya. Shalawat sareng salam mugi ditetepkeun ka jungjunan urang sadaya nyatana Kangjeng Nabi Muhammad SAW, ka kulawargina, ka para sahabatna sareng ka para umatna anu nganut kana ajaran mantenna, malah mandar lumeber syafa'atna ka urang sadaya, amin ya robbal 'alamin.

Para Bapa/Ibu hadirin sadaya, langkung tipayun simkuring seja ngahaturkeun rebu nuhun ka para wargi sadaya, anu parantos tiasa nyaosan pangulem simkuring, kanggo maparin du'a restuna kana kalahiran pun anak anu ka ..... anu parantos lahir kalayan salamet dina dinten .... ping .....

Teu hilap simkuring ngahaturkeun nuhun ka para wargi sadaya, anu parantos ngiring ngabantu boh saran atanapi nasehat ka pun bojo sarta pidu'a na ti para wargi demi kalancaran lahirna jabang bayi anu alhamdulillah berkah kalayan salamet. Dina kasempetan ieu simkuring nyuhunkeun disaksen ku para wargi sadaya, wireh pun anak anu nembe dilahirkeun ieu dipaparin jenengan : ............

Minangka nembrakkeun rasa syukur simkuring ka Allah SWT, anu mana parantos maparin karunia-Na ka urang sadaya, khususnya ka kulawargi simkuring, para wargi sadaya diulem ku simkuring di ieu patempatan kanggo sakadar tuang leueut alakadarna.

Salajengna simkuring neda sihapunten anu kasuhun, bilihna seueur kakirangan boh anu ngeunaan tina panampian atanapi panyambutan sareng idangan anu ku simkuring sakulawargi disayogikeun.

Para bapa/ibu hadirin sadaya, mudah-mudahan urang sadaya kalebet jalmi anu teu weleh syukuran kana ni'mat sareng karunia anu dipaparinkeun ku Allah SWT. ka urang sadaya, amin ya robbal 'alamin. Margi ngemutkeun kana pidawuh Allah dina al-Qur'an anu kaunggel dina surah Ibrohim ayat 7, anu pihartoseunana "Jeung (sing inget) nalika Pangeran maraneh cumeluk: "Saestuna upama maraneh muji syukur, tangtu Kami baris nambahan (karunia) ka maraneh, jeung upama maraneh kufur, nya saestuna siksaan Kami kacida peurihna." (QS. Ibrahim:7)

Rupina dicekapkeun sakitu wae nu kapihatur, akhirul kalam wabillahi taufik walhidayah, Wassalamu'alaikum Wr. Wb.